18 elevar frå geofag 1, geofag 2, teknologi og forskingslære 2 var på tur til Island frå 10. til 14. mars 2025.
Fyrste dag gjekk til reise, innlosjering på Baron's Hostel Reykjavík, eit kort skolebesøk på Tækniskólinn, før middag på Hard Rock Café Reykjavík.
Tysdag gjekk innleigd buss frå Hallgrímskirkja kl. 09.00 i retning sør-aust. Fyrste stopp var LAVA Centre ved Hvolsvöllur, ein liten stad med utsikt til mange av dei kjende vulkanane på Island, mellom anna Hekla og Eyjafjallajökull.
Ferda gjekk vidare til Reynisfjara Beach, betre kjend som Black Beach. Der veksla varselljoset mellom grønt og gult faresignal, låg vasstand og ganske jamne havdønningar. 14 dagar tidlegare hadde dønningane ført sand inn på parkeringa, og staden er rekna som ein av dei farlegaste på Island. Vi var heldige som var der på ein av dei tryggaste dagane.
Vi hadde pause ved Vík í Mýrdal, omtrent så langt sør ein kan kome på Island. På heimturen var vi innom Sólheimajökull, ein brearm til Mýrdalsjökull, isbreen som ligg over vulkanen Katla. Vi stoppa òg ved Seljalandsfoss. Ferda slutta ved KFC i Reykjavík.
Onsdag starta med eit nytt skolebesøk, omvising og sosialt samvær med klassa til Úlfar. Deretter tok vi buss til Hveragerðisbær og drog på opplevingstur inn Reykjadalur Hot Spring Thermal River. Etterpå var det middag på Subway ved Regnbogegata i Reykjavík. Det var ikkje alle som hadde fått nok av varme bad, så ei gruppe reiste til Sky Lagoon, medan andre besøkte Sundhöllin offentlege bad, like ved hostellet.
Torsdag var det ein ny busstur, denne gongen nordvestover mot halvøya Snæfellsnes. Landskapet var eventyrleg, med snødekte vulkanar, lange grasdekte sletter, basaltstøtter, ravinar og meir. Vi vandra på snø, inn i ravinar (Rauðfeldsgjá), langs fuglefjell og klipper av basalt ved Arnarstapi.
Vi gjekk opp på eit vulkankrater (Saxhóll Crater) og besøkte sjølve Kirkjufell, Islands mest fotograferte fjell, kjent frå Game of Thrones sesong 6 og 7. Det var ein trøytt gjeng som kom tilbake til Reykjavík, der siste middag vart pizza frå Domino’s.
Fredag gjekk turen heimover via Oslo.
På turen har elevane jobba med prosjektoppgåver i faga sine, og samla minner og opplevingar.
Takk for turen!
